اسم الله الفتاح

الفتاح

يعني ايه الفتاح؟؟ الفتاح من الفتح يعني ازالة كل شىء مغلق يعني لو موضوع اتقفل في وشك مفيش غيره الفتاح الذي بارادته يفتح كل مغلق. شوف الأية الكريمة بتقول ايه! *ما يفتح الله للناس من رحمة فلا ممسك لها * قد ايه الأية جميلة قوي .شوف فلا ممسك لها تحس انه سيل من الرحمة و محدش حيقدر يوقفه.. هو ده الفتاح

عايز تنجح و تتفوق في دراستك او في شغلك الجأ للفتاح يفتح عليك في مذاكرتك وفي انك تلاقي شغل ادعيه قول له افتح عليه لو عايز

دفعة,عايز امل ,كل شيء حواليك بيخليك تيأس، خلي عندك يقين في الفتاح لازم اليقين لازم تكون متأكد ان مفيش حد حيحلها الا هوه حتي لو لجأت للناس عشان يساعدوك ماشي طبعا لأنك لازم ناخد بالأسباب لكن الفتح مش حييجي الا من عنده و الناس دول مجرد وسائل مساعدة. و علي فكرة اللي بيقدره ربنا هوه اللي فيه الخير حتي لو انت مش عارف دلوقتي لكن اكيد حتعرف انه عملك الخير

لو قفلت في وشك ,لو الدنيا ضلمت , لو الدموع نزلت و مفيش حل روح للفتاح..لو نفسك تعبده و يحبك روح له و اكيد حيفتح عليك

لو حد ظلمك ,لو حد اذاك ربنا يفتح بين المتخاصمين بالحق *قل يجمع بيننا ربنا ثم يفتح بيننا* ...*ربنا افتح بيننا وبين قومنا بالحق و انت خير الفاتحين*....بس علي فكره الفتاح يحبك انك تؤمن بقوة ولأخر لحظة لأنك مش عارف امتي الفتح فيختبر مدي اصرارك و ثقتك و لأن الفتاح يأتي بالفتح من حيث لا تدري و قد يأتي قمة الفتح من قمة الاغلاق

شوف قصة سيدنا يوسف و اتأملها كويس حتلاقيه اترمي في البئر و بعدين اشتراه العزيز و بعدين دخل السجن و بعدين طلع و اتولي خزائن الملك شوفت الفتاح....لان الفتاح اذا فتح فلا يكون فتحه عاديا و انما فتحه مبينا ليس كما تتخيل اسمع الأية *انا فتحنا لك فتحا مبينا ليغفر لك الله ما تقدم من ذنبك و ما تاخر* ا

الفتح ياتي في لحظه و بأهون الاسباب فلنبحث في اقرب فرصة عن لحظة فتح

و العشر الاواخر من رمضان و انتظار ليلة القدر من احسن الفرص فلا تضيعها